Dai hpang, Lai Sai a mayu Ntawng Ure Tsalung Nawng a Lahpai la ni mung shang lawm let, Nkrung Tu
kaw hkap shingla nga ai Hkaman ni hpe him gasat mu ai.
Hkaman ni hpyen n-gun grau law ai rai nna n dang mu ai Kade shakut yu tim, Hkaman ni a hkap hkam rit (ခံတပ်)n lu baw ai majaw, htingnut nna bai bawngban ma ai.
Shan yan a n-gun hte sha n mai dang ai hpe hkam la,
yin la manu ai. Hpyen garum saw ra wa ai hku rai malu ai.
Rai tim, Lajawn Nawng Hpung mung, shanhte Chyasen
kata kaw gumlau majan byin nga ai majaw, hpyen garum n-
gun n lu mai ai. Ure Tsalung Nawng mung, Mali Nmai walawng de she Lahpai amyu law ai re majaw, hkyak hkyak hpyen garum n-gun n lu mai nga ai. Ni nawn ai hkan nga ai
ni gaw, Lai Sai Gumhkawng a sai daw sai chyen Marip baw pa ni hkrai rai nga ai.
Rai tim, kadai Marip la wa mung hpyen garum na n du, n pru wa ai. Dai gaw, Lai Sai Gumhkawng hte Lajawn Nawng Hpung a shada mayam yam na dagam dala ga hpe
na chye ai majaw rai nga ai. Dai majaw Lai Sai Gumhkawng
gaw, Hput Daw kaw nga ai Marip Naw Bum Bawng Tawng Nawng kaw sa wu ai. Naw Bum Bawng Tawng Nawng tsun ai gaw,
"hpu yan a dagam dala ningwa bai raw kau mu, shaloi anhte garum na ga ai" ngu wu ai
Naw Bum Bawng Tawng Nawng a ga hpe myit hkrum
sai rai nna, Daru bum na dagam ningwa hpe, nat jaw nna
bai raw kau masai.
Bawng Tawng Nawng kaw Sutjang Nbu Ba hte Nding Wa (Nding, Pyen Tingsa) ngu ai share lahkawng lawm nga ai. Sutjang Nbu Ba gaw, Nga Htang, Sut Jang ngu ai Lahpai baw pa rai nna, Bawng Tawng Nawng
a mayu kahkau majing rai nga ai. Bawng Tawng Nawng a
kawoi gaw Sutjang Roi Grawng rai nga ai.
Daru bum kaw nat bai jaw la nna Hkaman gasat na
rawt wa masai. Hkaman ni mung Nkrung Tu kaw hkap nga
tik tik re. Ndai lang gaw hpyen garum hpung kaw na share
Sutjang Nbu Ba he Nding wa woi awn ningshawng htim
gasat na rai nga malu ai. Sutjang Nbu Ba gaw npu de nga ai
Hkaman ni a sat lawat hpe grau tsaw ai bum ntsa na masem
maram taw nga ai.
Tsammara mi tsaw ai nhkap ntsa na, lapai ta hte hpun lakung langai mi kaw noi, lahkra ta hte ntawng nhtu lang rai masem bu nga ai.
Nding share wa gaw makau kaw
chyahtai shaje langai nep dung, ninggang hpe gaw lapai
maga tawn rai, maja taw nga ai. Sutjang Nbu Ba gaw, hpyen
sha maja ai rai nna, hpun lakung hpe atsawm n yu hkrup ai
majaw, hpun lakung chyahkraw hpe noi hkrup nga wu ai.
Aten loi na wa jang, hpun lakung chyahkraw gaw,
Sutjang Nbu Ba a hkum namnak hpe n dang hkam ai rai
nna, ye daw mat ai majaw Sutjang Nbu Ba mung, krung de
nhtangchyung hkrat bang mat nu ai. Shaloi makau kaw maja
dung nga ai share Nding wa mung, manang wa him bang
mat wa sai ngu sawn la nna, shi a ninggang masawp hta let
hkan gumhtawn nang mat wa sai. Shi masawp adun hkrup
ai gaw, shi a ninggang n re sha, shi dung nga ai chyahtai
shaje matu ang mat ai.
Hpun dung de hpre she, hpra she nga ngoi wa ai majaw, Hkaman luksuk ni jawm mada mu yang, lamu ntsa na shinggyim lahkawng pyen hkrat wa ai majaw, yawng mau kajawng mat manu ai. Nding wa mung hkrat tsawm nna ga ntsa du ai hte mau nga ai Hkaman ni hpe azat bang wa wu ai.
Lai Sai a hpyen hpung law mi law mung, lam tung tung kagat hkrat wa yang, lamu na pyen hkrat wa ai yan hpe sha ajawm nga ai majaw, aloi sha lu lai bang nna
shang azat tik tik rai wa masai.
Sutjang Nbu Ba mung htan bran ai he hkan azat bang mat wa wu ai.
Hkaman ni mung kajawng tsawm mat nna yawng htaw mat sai. Shaloi she Sutjang Nbu Ba gaw,
shi hpun lakung daw nna di hkrat ai she lam tsun ai. Nding
wa mung shi a ninggang gaw bum ntsa ngam mat nna, shi
lang lagra hkawm ai gaw, chyahtai shaje re lam tsun ai.
Dai shani kaw nna
Nding Htoijep Lagra ngu ai mying lu wa ai rai.
Hkaman ni a hkap hkam (ခံတပ်)shara hpe hpya malawng
kau ngut ai hte, Supsa hka nam maga hpung mi, Nsau hka
maga hpung mi, Kaba zup Singgai maga de bum marawn
hkan let hpung mi rai nna, Hkaman ni hpe matut manga
bang wa masai. Hkaman ni mung Hkamau hku hku nna Tabyi hku, Tabyi hku kaw nna Tawang hku, Tawang hku
kaw nna Tayun hku du hkra hprawng mat masai rai. Dai ni
na ten hta Dayun hte Talau hka lapran Mishami ginra hta
nga pra nga ma ai rai.
Hugawng Pa hpe gasat zing madu la ai hpang, Lai
Sai Gumhkawng mung Nding Htoijep Lagra hpe Singgai
jum maw ap nna shagrau shaa wu ai.
Laika ka ai wa hku
nna, Nding Htoijep Lagra a matu mara, shu mashi shu masha
hpe mu dep chye kau dat ai gaw, Salang Kaba Nding Seng
Hkam re. Laika ka ai wa asak naw kaji ai re majaw, Salang
kaba a aya hpe gaw atsawm n matsing ai rai tim, Ninghtawn
Uphkang Du rai na re ngu sawn lu ai.
1968 ning, num ta na nga lun madim ladaw hta, Danai
hka hku de na nga lun madim wa kaw, gan hkring sa nga ai
ten, tai hpyen hpung akajawng du pru wa ai. Madim sara
wa hku nna
"zim sha myi man n hten dung nga u, anhte
ladat shaw tsun shaga shalai kau na"
" ngu yang, Salang kaba
gaw mazaw n zim nna gumhtawn pru mat wa ai hpe tai ni
hkan shachyut gap nna si sum mat wa sai.
By,NawBum Marip Duwa Wanghkang Awng a Hugawng share jaubu ni a labau laika buk.
Comments
Post a Comment